Dandruff: Cause and Solution for African Hair

Dandruff! Dandruff! Dandruff! 😰

Dandruff no be small play o. If you don battle with-am or still de battle-am, know say, you no dey alone o! Dandruff na common scalp wahala wey de affect people of all color and tribe. No matter where we all come from, many don battle with-am at one point or the other for their life. Some no free from-am till today.  Dandruff no just be about those small white pieces things wey dey the scalp alone o, the scratching wey e de cause sometimes, fit shame person.

Wetin be Dandruff self? Wetin de cause-am? How e take different from dry scalp? How e fit affect person confidence? How you fit treat-am naturally and prevent-am from happening again and again? Find out answers to this question-dem as this article go pieces everything down for you. Make you try calm to learn and share this article to everybody wey you know, even our men-dem.😎

Wetin Be Dandruff?

Dandruff na when the head de throway dead skin comot for scalp from fungi or yeast infection as a result of too much oil for body and scalp. The dead skin go show and stick for scalp as small pieces wey them de call flakes. For people wey get African hair, e fit show as dry, sticky, white or yellowish pieces wey fit show well-well for dark hair and cloth.

Wetin De Cause Dandruff?

Na plenty things de cause dandruff.  Some na; 

• Oily skin 

• Fungal infections 

• Dry scalp 

• Harsh hair products 

• Poor hygiene

Signs of Dandruff

• Flakes wey de show for head and cloth

• Head wey de scratch

• Redness for head

• Feeling of tightness or discomfort for head

Effect on Women's Everyday Life

For many African women, dandruff fit de cause plenty wahala and shame. E fit cause itchy scalp, irritation, and even hair loss wey fit de distract and de make person uncomfortable especially for social or workplace, and even for salon self.  This one fit reduce person confidence and affect how person de dey productive.

Dandruff vs. Dry Scalp

As we don discuss-am for our previous article wey e title na Dry Scalp: Causes and Solutions for African Hair , dandruff and dry scalp resemble well-well. Some de confuse and wonder which one them de battle with exactly? E dey important make we sabi the difference between dandruff and dry scalp so that we go fit sabi the right way to treat them. Make we see 3 areas wey they take dey different.

• Dandruff de happen when skin de produce too much oil, wey make yeast-like fungus de grow for scalp, while dry scalp de happen when the scalp no get enough oil or moisture.

• Dandruff de make head dey oily or greasy, while dry scalp go make-am dry.

• Dandruff pieces or flakes dey bigger and oily, e fit de gum to the head and hair, while dry scalp pieces or flakes dey smaller and dry, e de fall-out easily from the head.

Natural Remedies for Dandruff

For people wey like and appreciate natural solution, them fit try some things like. 

• Tea tree oil: E get antifungal property. You fit mix-am with carrier oil like coconut oil and apply for head. Wash-am comot with mild shampoo after 30-40 minutes and deep condition after.

• Neem Oil: E get antifungal property. You fit mix-am with carrier oil like coconut oil or olive oil and apply for head. Wash-am comot with mild shampoo after 30-40 minutes and deep condition after. You fit also de add few drops to your shampoo before use. Check our DIY-DIU Page for better Neem Oil

• Aloe vera gel: E fit help to calm irritation and moisturize the head. Rub aloe vera gel wey you don mix with small coconut oil for scalp. See the article "How Aloe vera fit help your hair". Leave-am for 30-40 minutes before you wash-am comot with gentle shampoo. Deep condition after.

• Apple cider vinegar: E fit help to restore balance and reduce itching. After you don shampoo and rinse finish, use 1/2 cup of Apple cider vinegar with 1 1/2 cup of cool water wey you don mix together to rinse your hair.  No rinse-am comot, just deep condition immediately and rinse comot after. For another way, you fit also spray your scalp with apple cider vinegar wey you don mix with water (vinegaer go be half of water) to your scalp. Massage small and leave for your hair for like 10-15 minutes. Wash-am comot, shampoo and deep condition the hair as usual.

• Lemon or Lime Juice: The vitamin c and citric acid wey dey inside lemon and lime fit help to kill and remove the fungi for dandruff scalp. This remedy dey popular with our ancestors-dem to treat dandruff. You fit use lemon or lime juice alone or with other things as you de see below.

1. Mix lemon or lime juice alone or mix with small water: Apply the juice only with cotton wool to your scalp or mix-am with water if you get sensitive scalp. Leave-am for like 15-20 minutes. Wash-am comot with sulphate-free shampoo wey you don mix with neem or hibiscus oil. Deep condition after.
2. Mix lemon or lime juice with small coconut oil: Apply lemon or lime juice wey you don mix with coconut oil for your scalp and leave-am for like 15-20 minutes. Wash-am comot with sulphate-free shampoo. Deep condition after.
3. Mix lemon or lime juice with plain youghurt and honey: The combination of these three things de work wonder. The kind acid wey de inside lemon or lime and plain yogurt plus honey wey be correct moisturizer go help remove the dandruff and leave your scalp moisturize. Apply the combination for your head.  Leave-am for like 15-20 minutes. Wash-am comot with sulphate-free shampoo. Deep condition after.

Routine Recommendations to Fight and Prevent Make Dandruff Come Back

• Maintain a Healthy Scalp: De wash your hair well with mild shampoo to remove excess oil and dirty, so that dandruff no go see space breathe. Make sure say your scalp de dey clean and moisturized to stop dandruff from coming back. Always add herbal oils like neem or hibiscus oil to your shampoo. We fit also make other DIY-DIU herbal oil or pomade for you if you want.

• De Use Anti-Dandruff Shampoo: Find shampoo wey get ingredients like ketoconazole, selenium sulfide, or zinc pyrithione to fit help control yeast, reduce flakes and fight dandruff well-well. E dey important to de use these kind shampoo regularly for better result especially if you no too de use natural things wey we don recommend.

• Limit Hair Products: No de use too many hair products or harsh chemicals wey fit make the scalp to de scratch you and cause dandruff. If you notice itching after using one product, reduce the amount and number of times you de use-am. If nothing change, stop-am and find other alternatives.

• Regular Scalp Massage: So that blood go fit de flow well for scalp and make scalp dey healthy, de do regular scalp massages with natural and herbal oils. We get natural oils like neem oil, onion oil, ginger oil, aloe vera oil wey we fit work around to make a scalp massage oil for you.

• De Wash and Disinfect Your Combs: Always wash your combs and other hair tools wey get direct contact to your scalp and disinfect them regularly. No de share combs with others.

• Avoid Stress: Stress fit make dandruff worse, so try de do things wey fit reduce stress.

• Balanced Diet: Eat better food wey balance, get vitamins and minerals to make scalp strong and reduce dandruff.

Conclusion:

With the right knowledge and care, you fit manage dandruff and dry scalp wahala well-well. Make you embrace proper hair care wey include gentle cleaning, good treatments, and natural remedies so that you go get healthy scalp and fine hair. Embrace wetin nature don give you to protect your hair and scalp! 😍

I remain with you, 

MamaDelight 😍

AfricNaijaHairCarePidgin! 😍😍😍

#AfricanHairType, #AfroHairType, #AfricanHair, #NigerianHair, #AfroHair, #Blackhair, #AfricanHairCare, #AfroHairCare, #NigerianHairCare, #Nature, #NaturalHairCare, #NaturalHair, #Relaxedhair, #HairTips, #GrowLongHair, #HairGrowth, #Naturalvs.Relaxed, #PidginEnglish, #HowTo, #Benefits, #Challenges, #HairJourney,  #AloeVera,   #dryscalp,  #dandruff,  #Itching, #AfricNaijaHairCarePidgin, #Africa, #AfricanHeritage, #AfricNaija, #Understand, #Sabi, #Africansheabutter, #sheabutter, #DandruffSolution #FlakyScalp #AfricanHairCare #HairCareTips #NaturalRemedies #HairHealth #HairGoals

Join us for AfricNaijaHairCarePidgin.blogspot.com to learn more about how you fit take care of your African hair well-well.