How Aloe Vera Fit Help Your Hair: Benefits and Caution

For the world of natural hair care, Aloe Vera stand-out as African solution wey people de hail for im healing and medicinal power. From ancient African civilization come reach modern-day discovery, we don see say the power wey Aloe Vera get to help hair de do well and make scalp dey okay, no be here o. Make we try examine wetin many of us wey don use these beautiful plants for our hair don find-out.  We go also see different ways wey you fit use-am for your hair care routine. Make we start, abeg, no time! 😉

Ancient Roots for African History

The use of Aloe Vera for African culture no be today, e don start tey-tey.  For Africa, some indigenous tribes don de use Aloe Vera for different things, including hair care. E cooling and moisturizing effects make-am important for traditional beauty rituals and medicinal practices.

Wetin Modern Research Don Find Out

Modern Research don find-out say Aloe vera get plenty vitamins like A, C, and E. All these three vitamins de help cell turnover, wey fit make cells for person body de grow well and the hair to shine well.

Research still help us see say Vitamin B12 and folic acid dey inside aloe vera gel too. Both of them fit help help make hair stop to comot.

Modern research still don confirm say the vitamins inside aloe vera fit also help repair the damage wey sun dey cause to hair, stimulate hair growth, soothe scalp wahala, and moisturize the hair shaft. All the plenty vitamins, minerals, and enzymes wey dey inside Aloe Vera gel make-am dey effective to maintain healthy scalp environment wey fit help make hair de do well and grow well.

3 Benefits of Aloe Vera for Hair Care

• E fit help hair grow: Aloe Vera get enzymes wey fit ginger hair follicles and this go fit help make hair strong and dey healthy.

• E de soothe scalp wahala: The anti-inflammatory properties wey Aloe Vera get fit calm down scalp wahala like scalp inflammation, dry scalp, reduce itching, redness, and dandruff.

• E de moisturize and condition hair: The hydrating power wey Aloe Vera get fit moisturize the hair shaft, wey fit help prevent dryness, breakage, frizz, and split ends.

3 Different Ways to Use Aloe Vera for Healthy Hair

• Aloe Vera and Coconut Oil Treatment: Apply fresh Aloe Vera gel wey you don blend with coconut oil directly to the scalp and hair for conditioning treatment wey go repair and hydrate dry or damaged hair. Cover and leave-am for 30 minutes. Wash your hair with sulphate-free shampoo and deep condition after.

• Aloe Vera Oil for Hot Oil Treatment or Shampoo and Conditioner enhancer: Blend aloe vera with coconut or olive oil and fry-am small on low heat to extract the oil or soak aloe vera inside coconut or olive oil and cover for up to 4 weeks to make cold-pressed oil. Use the oil sometimes as hot oil treatment before shampoo or add to your shampoo or conditioner to strengthen and nourish your scalp.

• Aloe Vera and Whipped Shea butter: Mix Aloe Vera gel inside shea butter to make emulsified shea butter and aloe vera oil to make whipped shea butter. See how you fit do-am for our article, "Find Power Wey Dey for African Shea butter".

Caution and Tips for Aloe Vera Use

• No use Aloe Vera directly on-top your scalp or hair without adding carrier oil like coconut or olive oil. E go dry-up your hair and scalp immediately or with time, depending on your hair condition. I don hear some persons complain say aloe vera de break their hair. The reason na because they no de add oil with- am.

• Make sure say you cut off the shuku-shuku for the edge of the aloe vera plant and remove the yellow water wey de drip from inside if you cut-am. Those parts no good and fit cause reaction for you.

• Too much of everything no good. No too de use pure aloe vera gel every time for your hair. Use-am ones in a while or only when your hair need-am.

• Test Aloe Vera for small area on top your skin before you use much, so that you go fit dey sure say you no react to-am.

In Summary, Aloe Vera de offer natural remedy for various hair issues. However, e dey important to dey careful make we no use-am directly on the scalp or hair without adding carrier oil, no de use-am too much, and no use-am without doing patch test.

The role wey Aloe Vera de play for African hair care tradition don pass time, e still de offer natural solutions for healthy hair growth and maintenance. If you embrace this ancient wisdom, you no go regret-am. Abeg, continue to appreciate wetin nature don give you to maintain and shine your hair! 

I remain with you, 

MamaDelight 😍

AfricNaijaHairCarePidgin! 😍😍😍

#AfricanHairType, #AfroHairType, #AfricanHair, #NigerianHair, #AfroHair, #Blackhair, #AfricanHairCare, #AfroHairCare, #NigerianHairCare, #Nature, #NaturalHairCare, #NaturalHair, #Relaxedhair, #HairTips, #GrowLongHair, #HairGrowth, #Naturalvs.Relaxed, #PidginEnglish, #HowTo, #Benefits, #Challenges, #HairJourney, #Understand, #Sabi, #Africansheabutter, #sheabutter, #AloeVera, #AloeVeraOil, #AfricNaijaHairCarePidgin, #Africa, #AfricanHeritage, #AfricNaija