Find The Power Wey Dey for Neem (Dogoyaro) Tree: How E Fit Help Your Hair Grow Well

For Africa, people wey sabi traditional medicine don use neem for many years now, and e don show say e get power to cure plenty-plenty sickness. This tree wey them de popularly call 'Dogoyaro' for Nigeria get special place for the heart of plenty Africans because of the strong medicine power wey e get. Neem get plenty advantage for health, but the way e take de also improve hair and help am grow well don de ginger plenty of us wey no sabi wetin nature and our ancestors don give us.

 As people de find better ways to take care of their hair naturally, na so them begin dig more into things for nature wey our ancestors no de take play.  Neem tree dey among wetin they find and come realize say na one solution to make hair fine well-well. This neem tree get chemicals wey de fight inflammation, bacteria, and fungi. The leaf, seeds, and oil, dey good well-well for treating plenty scalp wahala wey fit stop hair from growing well.

 

Wetin Neem De Do for Hair Growth

 See 3 ways this tree de take support strong and healthy hair:

•  Improve Scalp Health: Neem get plenty vitamins, antioxidants, and fatty acids wey  make am dey full of nutrients. E fit prevent dandruff and scratching because of the way e de fight infection for scalp. Neem de make sure say your scalp dey okay so hair go fit grow well. 

• Help Blood Flow: When you rub and take neem oil massage the scalp, e go make blood flow well for the scalp. With this, hair follicles go get better food wey e need to make hair grow well. 

• Make Hair Follicles Strong: This neem get plenty power wey de make hair follicles dey strong. E de stop hair from breaking and e de make sure say hair no dey scanty for person head. E still get protein wey dey make hair strong and no de break anyhow.

 

How to Use Neem for Hair Care

 I don see different ways wey people don take use Neem for their hair before o, but from how our mama-dem take use am, my own personal experience and modern research, 3 ways stand out among all. Make we see the 3 best and safest way to take use neem care of your hair well:

3 Best and Safest Way to Use Neem for Better Hair Growth

1. Massage/Rub Neem Oil for Scalp 

One correct way to make neem help hair grow well na to rub neem oil for the scalp. To do am, follow this steps:

• Mix-am Well with Another Oil: Mix neem oil with another oil like coconut or olive oil so e no go too strong. E good make you mix-am like ratio 1:4 (neem oil to the other oil).

• Apply Am for Head: Part your hair small-small and rub the mixed neem oil on-top your scalp first, and then after, rub-am for your hair. Massage your scalp in small-small portion round, for clockwise or anticlockwise direction for like 5-10 minutes.

• Leave-am: Cover your head and leave-am for like 1-2 hours or overnight if you fit. Wash your hair well with mild shampoo wey no too strong. Deep Condition after.

 

2. Rinse Hair with Neem Water

When you use neem water to rinse hair, e fit help hair grow well and e go still make your scalp dey okay. To do am, follow this steps:

• Boil the Leaf: Boil neem leaves for water till the water change color and turn green.

• Let Am Cool Down: Make the water cool small before you comot the leaf from inside. So, e go remain only the neem water.

• Rinse Your Hair: After you don wash your hair with shampoo, use the neem water take rinse-am last. Rub am for your hair and scalp, then make am stay for small time before you rinse-am comot. Apply small deep conditioner wey you don already mix with small coconut oil. Make the conditioner stay the normal time make e for enter your hair well before you wash am comot. Allow your hair to dry naturally.

 3. Use Neem Oil Inside Shampoo

When you put neem oil for your normal shampoo, e go help to make your scalp strong and help your hair grow well. Wetin you need to do:

• Mix with Shampoo: Mix very small neem oil with your normal shampoo wey go reach you wash your hair one time.

• How to Use: After you don pour water for your hair to wet and soak-am well, Rub this shampoo well for your scalp and hair, just like how you de use normal shampoo. Massage your scalp for round motion for some time before you wash am comot. Use deep conditioner after.

How to Make Neem Oil

You fit make neem oil from either the leaf or the seed of neem tree. You fit still combine both the neem leaf and seed together to make your neem oil.*

Making Neem Oil from Neem Seeds

Wetin You Go Need:

• Neem seeds
• Coconut oil or any other carrier oil wey you like
• Mortar and Pestle or Blender to grind am
• Pot
• Cheesecloth or Better Strainer
• Airtight glass bottle or Plastic jar

How to Do am:

• Gather Neem Seeds: Find ripe neem seeds. Remove the cover from the seeds.

• Clean the Seeds: Wash the seeds well to comot any sand or dirty.

For Fresh Seeds:    

• Blend the Seeds with Oil: Use mortar and pestle or blender to grind fresh neem seeds with the oil wey you wan use.

• Extract Oil: You fit use either of the two methods. Method 1: Pour the combined blended neem seed with oil for small container wey fit tolerate heat and put the container inside another pot wey water don already de boil for inside (Double-boiler method). De stir am small-small for some time until the oil begin change color. Method 2: Put the combined blended neem seed with oil inside a pot on top low heat. De stir am small-small for some time until the seed go infuse well-well inside the oil.

For Dry Seeds:

• Dry the Seeds: Make sure say the seeds dry well. E fit take some days to one week depending on the weather.

• Crush or Grind the Seeds: Use mortar and pestle or blender to grind the dry neem seeds until e be like powder.

• Remove Oil: You fit use either of the two methods. Method 1: Pour the oil wey you wan use and the grinded dry neem seed for small container wey fit tolerate heat and put the container inside another pot wey water don already de boil for inside (Double-boiler method). De stir am small-small for some time until the oil begin change color. Method 2: Heat the oil with the dry grinded neem seed inside a pot on top low heat. De stir am small-small for some time until the seed go infuse inside the oil. Method 3: Pour the dry blended need seed with oil inside a container wey get tight cover. Mix am well-well. Cover-am and leave am for up to 21 days (Cold-Pressed)

• Filter-Am: Once the oil turn brown and e get strong smell, carry am comot from heat, make e cool and stay for like 6-12hours. Then, use cheesecloth or strainer to separate the oil from the seed wey remain.

• Keep-Am Well: Put the neem oil wey you don get inside bottle wey close well. Put-am for place wey no too hot and try no expose-am to sun.

Making Neem Oil from Neem Leaf

Wetin You Go Need:

• Fresh neem leaves
• Coconut oil or any other carrier oil wey you like
• Mortar and Pestle or Blender to grind am (Optional)
• Pot
• Cheesecloth or Better Strainer
• Airtight glass of plastic jar

How to Do am:

• Prepare Neem Leaves: Wash the neem leaves well. You fit use fresh or dry ones. Make them dry well-well if na dry one you wan use. But no dry am if na the fresh one you wan use. For me, I prefer the fresh leaf sha. 😉

• Crush or Chop the Leaves: Use mortar and pestle or cut the fresh or dry leaves into small pieces. You go need to blend the fresh one with the oil to a paste if na fresh leaf you wan use.

• Mix with Carrier Oil: Put the carrier oil for pot and add the dry chopped or fresh blended neem leaves. Make e dey low heat for some hours, de stir-am until the oil begin change to green. You fit also still use the double-boiler method wey we talk about for up.

• Cooling and Straining: Once the oil turn green and e get strong neem smell, carry am comot from heat and allow make e cool down, then use cheesecloth or strainer to filter am well.

• Store-Am Well: Put the neem oil wey you don get inside bottle wey close well. Keep-am for place wey no too hot, no de put-am for hot or sun area.

Wetin You Need to Remember

• Test-am First: Make you do small test first to check if your body go like neem before you begin use-am well.

• Mix-am Well: Make you no use neem oil wey strong too much, mix am well with other oil before you use-am for your hair.

• No Rub-am Every Time: Too much of everything dey bad. Abeg, no de use-am too much like every day or every week.  One-time in 2-3 weeks don do.

 

Neem Tree get plenty power wey fit change how hair de grow naturally. Neem leaf oil fit make your scalp dey okay and e go still help your hair grow well. You fit use-am for massage, for water wey you go take rinse hair, or put am for shampoo. Make sure say you no get allergy for-am before you begin use-am well-well. De use-am well only if e dey good for you. Use the power wey neem get make your hair for dey fine and healthy! Nature don give us something wey we fit use take care of our hair well. Abeg, No miss am! Use-am! Enjoy am!😙

Until next time, 

AfricNaijaHairCarePidgin! 😍😍😍

*Order From Me: You fit order better neem oil wey I go do special for your hair from me. I fit do-am for you (DIU) if you no fit do-am yourself (DIY). 😎

#AfricanHairType, #AfroHairType, #AfricanHair, #NigerianHair, #AfroHair, #Blackhair, #AfricanHairCare, #AfroHairCare, #NigerianHairCare, #Nature, #NaturalHairCare, #NaturalHair, #Relaxedhair, #HairTips, #GrowLongHair, #HairGrowth, #Naturalvs.Relaxed, #PidginEnglish, #HowTo, #Benefits, #Challenges, #HairJourney, #Understand, #Sabi, #Africa, #AfricanHeritage, #AfricNaija, #AfricNaijaHairCarePidgin, #Neem, #Neemoil, #NeemHairCare