14 Tips and Tricks to Maintain Healthy Relaxed Hair for African Way

Hello Relaxed Hair Family,

As we de waka go the land of fabulous hair, we don enter the road to better relaxed hair. To talk true, to maintain relaxed hair no be mein-mein 😏. Na special work wey need attention and care. Plenty people for Africa, especially for Nigeria wey I come from, believe say, relaxed hair no fit grow well or become long. This na because for the past years, e no too common to see person wey get long and healthy relaxed hair. Sometimes, the hair fit just de dry anyhow, come de break before e even reach the length wey person want. Many don vex cut their hair and start all over again many times. Still, the hair no go just cooperate.

Make we enter inside 14 important tips and tricks wey I don learn in years from our grandmothers dem wey embrace relaxed hair and from this generation's better experience and new techniques. Believe me, if you follow this advice dem, your relaxed hair go de shine, and dey strong.

African Relaxed Hair

14 Tips and Tricks to Maintain Healthy Relaxed Hair for African Way

• Understand Relaxed Hair: Know say relaxed hair de go through special change because we de use chemical treatment make the natural curls relax and dey straight. So, to maintain this kind hair, you must take extra care to make am dey healthy and shine.

• De Wash Your Hair Wisely: No de always wash your relax hair make e for no de too dry. From experience, washing your hair with shampoo every week fit de dry am quick-quick. Unless your hair really need am, try no too de wash am less than every 2 weeks. Try de regulary wash am gently every 10-14 days to protect the natural oil and the African hair strength.

• De Take Care of Your Scalp: De massage your scalp with natural oil to make blood de flow well and make your hair relax. You fit do this one the day you go wash your hair or for other times.

• De Put Moisture Well Well: Relaxed hair de dry pass natural hair, so moisture dey very important. Use deep conditioner and leave-in conditioner often. Look for products wey get shea butter and argan oil to make your hair soft and well-nourished. Sometimes, on your wash day, you fit add small oil like coconut or olive oil to your deep conditioner before you apply am on your hair. Cover your hair with nylon or shower cap for like 30 minutes or more or as the product take talk.

• Herbal Things: E get some African herbs wey dey good and de make your hair strong. You fit de drink some and use others de rinse your hair. We go talk about this one well for future article.

• De Comb Your Hair Gently: Relaxed hair de quick break when you de comb am. Use your fingers first, then use wide-tooth comb, so e no go break. Start from the tip of your hair and work your way down to the root to prevent plenty damage.

• De Trim Regularly: Make you de cut the tip of your hair wey don weak comot for your hair to avoid split ends. 💇 Regular trimming go help your hair grow well and make your relaxed hair dey fine. I go advise say make you check for weak and split ends every time wey you want relax your hair. If you no de relax your hair often within one year, make you try de trim your hair every 8-10 weeks to remove the weak ends. But if you no see split ends, then, you no need to trim.

• No Too Much Heat: No de always use hot tools on your hair. Make you de allow am dry naturally after you wash am. Depend on how healthy your hair be sha, you fit use hair dryer for at least once a month for rolling styles. If you must use hand dryer, make sure say you apply better heat protector first. No set your dryer pass 50 for stand dryer. If na blow dryer, set am for "low" or "no heat".

• Protective Style: De run from styles and things wey fit damage your hair. No too de use gel, extensions, or wigs. Dem fit affect your hair growth. Our grandmamas dem no use those things like we de use dem now and their hair dey fine. Do protective styles like big twists, buns, or updos wey go protect your hair and still make you fine. But no stress your hair too much with plenty styles o. De give your hair break sometimes by just moisturizing and leave am to rest.

• De Protect Your Hair for Night: De wear satin or silk cap to cover your hair for night. Relaxed hair de quick break when you sleep and de rub am on top cloth wey e surface dey hard or cloth wey fit absorb the oil for your hair.

• No De Overlap Relaxer: Many hairdressers for Naija de put relaxer for the whole hair. Very few go put am only for new growth wey never get relaxer before. Your hair go spoil if you put relaxer on the part wey don already get relaxer before. Make sure say you only de put relaxer for new growth wey never get am before. If you overlap relaxer, e go spoil your hair and e go break am. Use protectants to coat your already relaxed hair before you start applying relaxers so that e no go too affect am if relaxer touch am by mistake. Also, make sure say you follow the time wey dem give you for the relaxer and do am well.

• De Listen to Your Hair: Your hair de talk to you. Try dey observant. Relaxed hair need plenty chemical to make am de shine. Some of these chemicals fit no good for your hair. Your hair fit talk by reacting immediately after some days, weeks, or months. E fit refuse to take-in the product and make the hair look shakashaka. The hair fit come de dry, break, change color, and plenty more. If your hair react immediately to any product wey you use and you don try everything wey you know but e no work, wash am comot sharp-sharp. And if na later e react, stop am! Your hair just de simply tell you say 'I no want am!' 🤮 No drag with am, listen and respect your hair. If one product de work well for your hair, no change am unless you no see am again for market or you no fit afford am again. No de change products anyhow, whether as big as relaxer or as small as your hair cream.

• Eat Well and Drink Water: The kind food wey you de eat de affect your hair. De eat food like fish, vegetables, and nuts for better hair and de drink water well well.

• Confidence Dey Important: Believe in yourself and your relaxed hair. Your beauty go shine when you dey happy with yourself. Carry your straight hair with pride, and remember, healthy hair na beautiful hair. 😀

In summary, to maintain relaxed hair, you need to take care of am well, use gentle methods, and believe in yourself. If you follow these tips and tricks, your relaxed hair go fine, shine, and dey full of life. Na the road to beautiful, relaxed hair journey you dey so o.Abeg, enjoy am!

#AfricanHairType, #AfroHairType, #AfricanHair, #NigerianHair, #AfroHair, #Blackhair, #AfricanHairCare, #AfroHairCare, #NigerianHairCare, #RelaxedlHairCare, #RelaxedHair, #HairTips, #GrowLongHair, #HairGrowth, #Naturalvs.Relaxed, #PidginEnglish, #HowTo, #Benefits, #Challenges, #HairJourney, #Understand, #Sabi, #Africa, #AfricanHeritage, #AfricNaija, #AfricNaijaHairCarePidgin.

With love,

AfricNaijaHairCarePidgin! 😍😍😍