10 Tips and Tricks to Maintain Healthy Natural Hair for African Way

 Hello my Beautiful People!

As I de always sing am like song, living with your natural hair na celebration of where we come from. This guide go show you keys wey you need to take unlock better hair wey de shine and dey healthy for our african way. The keys go dey inside one keyholder. E mean say you go need to de carry all the keys together as a bunch as you de start or don already dey this journey. E go help you to accept and care for your natural curls and waves. This keys na the different practical ways and techniques wey you fit use take care of your natural hair wey go give you confidence as your hair de shine. Make we start abeg, no time! 😎

African Natural Hair

10 Tips and Tricks to Maintain Healthy Natural Hair for African Way

• Sabi Your Hair Type: First thing wey go help you embrace your natural beauty na to sabi your hair type. Whether na Type 4 wey get tight coils or Type 3 wey get bouncy curls, every hair get e own need. You have to sabi your hair type so you go sabi the right products and routines wey go work well for you. To sabi your hair type, see our blog post "Understanding Your African Hair: Complete Guide to African Hair Types".

• De Wash & Deep Condition Your Hair Regularly: No wait until your scalp start to itch or your hair start to smell before washing. Wash with Sulfate-free Shampoo and de always allow make e dry naturally. From experience, to wash ones in two weeks no bad at all. With that you no go de get too much build ups for your scalp and the natural oil for your hair no go de strip comot.  Abeg, no manage water when you de wash your hair o. E de important make shampoo no remain for your hair. Apply Deep Conditioner and cover am for not less than 30minutes before you rinse-am comot. E fit pass 30 minutes sha, depending on how creamy and good your conditioner be.

• Moisture Dey Important: Natural hair love moisture well well. E de make your hair soft, smooth, and e de prevent-am from breakage. De hydrate your hair well with leave-in conditioners, deep conditioning treatments, and seal with natural oils like coconut oil and so on. You fit de do this one, twice, or more in a week depending on how much your hair de keep moisture. Try and know how many times in a week dey perfect for your own hair. Hair wey dey moisturized well de shine and look healthy.

• Dey Gentle When You De Detangle: Abeg, no de pull your hair anyhow or allow hairdressers to de pull your hair. If your hair tangle, use your fingers or wide-tooth comb untangle am gently. No rush am, start from the tip waka small small reach the root. E go reduce breakage. You fit section your hair to smaller part to make-am easier.  Make you de always remember say "if you comb anyhow, e go break anyhow".👩

• Protective Styles for Easy Days: Styles like twists, and traditional didi (inward cornrows), bantu knots, and other plaiting hairstyles de protect your hair from sun and e de prevent am from tangle. All these styles no just de reduce breakage, them still de give you chance to try different looks without any wahala for your natural curls. But sha o, protective styles no go help your hair if e de stay too long on your head. From experience between 1-2 weeks period no too bad. Anything more than that no de always protect again. 

• Air Dry or Low Heat: Allow make your hair de always dry naturally instead of using heat. You fit use Plaiting hairstyles to stretch your hair instead of using flat iron. If at all you need to flat iron or blow dry, set-am for low or no heat. Make sure you use better heat protector sha o.

• Trim Regularly for Healthy Ends: No fear to trim your hair from time to time. Regular trim de remove split ends, e go make your hair look full and healthy. Hair wey dem trim well no de break often, e de help hair grow well.

• Eat Better Food: Better food wey get vitamins, minerals, and protein de help hair grow well. Chop food like fish, green leafs, almonds, avocado and other food wey rich in iron. De drink water well-well and some herbal tea wey good for hair.  You no go believe how wetin you de put for your mouth go make your body and hair dey fresh.

• De Listen to Your Hair: Our hair de talk even though say e no get mouth. Sometimes, our hair de tell us if e like or no like wetin we apply on top-am. For some persons, e go react immediately, but for others, e fit react after some time, days, or weeks. At times, your hair fit tell you wetin de hungry am. E fit wan suck protein 😋or de tell you say over-protein de worry-am 😒😓. Abeg, de listen to wetin your hair de talk and give- am wetin e need. E dey important! No just de follow wetin dem talk online. Your hair fit change anytime, so listen well, know wetin e need, and give it to am.

• Confidence De Make You Shine: To accept your natural beauty no be only to de take care of your hair o, e also mean say you go accept your own special self. When you love and embrace your natural hair no matter the type or texture wey e be, e de show for your face. Enjoy your curls as sign say you dey special and strong.

More tips and tricks dey wey go help you care for your natural hair more. But for now, abeg, hold these keys wey we don put together for one bunch first. No remove anyone. De follow them and look into other post for this blog. You go dey surprise with wetin your hair go turn out to be in few months and years to come.

Natural Hair in Protective Style

To round up,

Accepting your natural beauty de connect you to where you come from and na journey wey de show self-love and self-discovery. No be just your hair you de take care of as you sabi your hair type, know how to care for-am, and wear your curls with confidence. All these things de nourish your inside too. No forget say na your real self de make you fine pass o. Make your natural beauty shine from inside!

With love & Curls

AfricNaijaHairCarePidgin! 😍😍😍

#AfricanHairType, #AfroHairType, #AfricanHair, #NigerianHair, #AfroHair, #Blackhair, #AfricanHairCare, #AfroHairCare, #NigerianHairCare, #NaturalHairCare, #NaturalHair, #HairTips, #GrowLongHair, #HairGrowth, #Naturalvs.Relaxed, #PidginEnglish, #HowTo, #Benefits, #Challenges, #HairJourney, #Understand, #Sabi, #Africa, #AfricanHeritage, #AfricNaija,  #AfricNaijaHairCarePidgin

Photo Credit: Uprising Man on wikimedia.org