You Fit Grow Your Hair Well

Hello my beautiful people! Oya, gather around, make we yarn about the way we fit take care our African-Naija hair wey go make am shine and reach e maximum beauty and length. 

 
Welcome to AfricNaijaHairCarePidgin blog, where we de reason everything wey concern haircare for Naija and the whole of Africa for our rich language of Pidgin English. We wan show you how you fit make your hair fine like better soup wey money kill die! 😜.

Beautiful African Women

                        

 Why We Start This Blog

We start AfricNaijaHairCarePidgin because we sabi the wahala wey plenty people de face when e reach to care for their hair. Whether your hair na natural krosh, relaxed, or you still de decide which one you want, we dey here to guide you.

Why Nigerians and Africans Need This Blog

Na true say we get one of most beautiful and unique hair for the world. But e come be like say we no de understand our hair sometimes. Many of us don chop plenty sorrow because of hair wahala like:

• Hair Breakage/Damage: Many of us sabi as our hair de sometimes break anyhow or even damage finish. E de pain us like say we don lost the whole world! Who no reach there no go know o.😞

• Product Confusion: With plenty hair products for market, e fit be like say you de waka inside market and you no sabi which one go work for your hair. You fit don try plenty hair products and still, they no just de work for your hair type. 

• Dryness and Dandruff: African weather or hair products fit make hair and scalp de dry anyhow, and dandruff fit come show face and sit-down for your head brekete as if say na e house be that 😒. No worry, we get tips wey go make your hair dey moisturized and dandruff-free.

• Length Struggle: E be like say your hair never grow reach where you want make e reach no matter how hard you de try. You don spend money tire! You fit de wonder, wetin de happen? 

• Stylist/Hairdresser Wahala: You don enter salon before with your better hair and come out de wonder immediately or after some days if na still your hair or another person hair dey on top your head? The way some hairdressers don wound your hair fit don pain you reach bone. E come be like say some stylist self just de use your hair play draft. 😏

 

How AfricNaijaHairCarePidgin Fit Help You

Our blog dey here to solve all these problems for you. We go break down hair care tips and advice into Pidgin English wey everybody fit understand. No long tori, no grammar wahala.

Wetin You Go Find For This Blog

• Natural/Relax Hair Care: If you dey rock your natural krosh-krosh hair, or you dey on relax hair, we go show you how you fit take care of your hair for house without wahala.

• Product Reviews: We go try products and tell you which ones go make your hair shine and which ones you go avoid. We go give you tips on how you fit still sabi better product by yourself.

• Hair Growth Tips: We go yarn you on how to make your hair grow like better vegetable for your farm.

• Style Inspiration: We go show you different styles wey go good for your hair and still make you fine and dey attractive like correct Jollof rice. 😄

• Hair Mistakes to Avoid: We go show you some common mistakes wey plenty people de make with their hair and how you fit avoid dem.

• Stylist Advice: We go help you know wetin you suppose talk to your stylist so dem go sabi how to treat your hair well.  

• Community: You fit ask questions and share your hair journey with other readers for our comments section.

 

Na we be your hair care partners, and we dey ready to help you achieve the hair of your dreams with correct Hair Care tips & routines. Make you no forget to subscribe and follow our blog, make you for no miss any of our Pidgin hair gist.

No forget to drop your comments and questions below. We dey here to help you solve any hair wahala wey you, your pikin dem, and loved ones get. Abeg, share this blog with them and your stylist too o. Together, we go make your hair shine!

Stay tuned for more tori and tips wey go make your hair shine like better gold. 

Until next time, Una welcome to AfricNaijaHairCarePidgin! 😍😍😍

#AfricanHair, #NigerianHair, #AfroHair, #Blackhair, #AfricanHairCare, #NigerianHairCare, #NaturalHairCare, #RelaxedHairCare, #NaturalHair, #RelaxedHair, #HairTips, #GrowLongHair, #HairGrowth, #HairJourney, #PidginEnglish, #Howto, #Africa, #AfricanHeritage, #AfricNaija, #AfricNaijaHairCarePidgin

Photo Credit: trevoykellyphotography on Pixabay